我要求政府研究將更多公眾地方劃為禁煙區時，應充分諮詢市民，同時應對所有行業進行經濟評估。

    飲食界係社會的縮影，八成的食肆老闆及員工都唔食煙，他們可能都討厭食二手煙，將食肆全面禁煙，對食肆的運作其實有好處，員工唔使倒煙灰，唔使洗煙灰盅，亦唔會見到煙頭將地壇燒爛，若處理不善，一些未完全熄滅的煙頭更加會燒爛桌布，對食肆造成損失，所以全面禁煙其實對食肆運作係有好處，可以減輕成本，但係點解食肆老闆同員工對食肆全面禁煙或擴大禁煙區仍然持保留態度，仍然咁憂慮？一字咁淺，就係怕生意受損!這就是飲食界的立場。

    有議員話食肆全面禁煙唔緊要，因為當間間食肆都要禁煙，照計就唔會影響生意，我未必反對這個睇法；但在另一方面，我又收到好多業界的意見，他們評估全面禁煙至少會減少一至兩成生意，在某些地區的食肆，生意可能更會減少三至四成，事實係唔係咁無人知，這個影響是否只係好似一些議員認為的短暫痛楚，要痛幾耐，我唔知道，相信這個議會內亦沒有一位議員可以肯定回答，因為大家都係靠估，或者靠參考外國經驗，其實就得個講字。

    因此我要求政府在研究擴大禁煙區範圍時，必須進行經濟評估，及參考外國經驗，找出充份資料及數據，讓業界及社會明白，有關法例對食肆、旅遊及其他受影響行業的真實影響。

    若果政府進行的經濟評估結果顯示，全面禁煙對生意無大影響，甚至會增加生意額，我相信唔使立例，食肆也會自動執行，執行的速度可能較政府立法更快。但若果評估出來的數據顯示全面禁煙會對食肆及本港的經濟會造成嚴重負面影響，會打擊投資意欲、打擊食肆經營、令更多食肆關門大吉，影響飲食業二十萬員工的生計，唔使我出聲，各位議員都會更加審慎去處理食肆全面禁煙的問題。

    我對市場調節抱有很大信心，由市場去決定食肆或者其他公眾地方的禁煙區範圍，會減少業界痛苦，所需時間可能比較長一些，但可以減少商界與市民，及吸煙者與非吸煙者間的衝突，亦可以避免商界或某一行業蒙受重大損害。

    我想在這裡好清楚同市民大眾講，其實我無既定立場，我只係要求政府在諮詢市民時，同時做埋經濟評估，找出更多數據，唔通咁都唔妥？

    最後我想講民主黨較早前進行的電話調查顯示，超過七成受訪者支持食肆及辦公室禁煙，其實民主黨唔使做調查，都會得到同樣結論，道理好簡單，大部分香港人唔食煙，民主黨調查的受訪者亦有超過八成唔係煙民，他們當然唔鍾意其他人食煙，邊個唔食煙的人會鍾意隔離個人噴煙？作為一個負責任的議會，唔應該單靠一個只訪問了一千人的調查，就確立本港應該推行食肆全面禁煙的結論，應該參考更全面的資料及數據。

    我尊重市民拒絕吸入二手煙的權利，亦關注到僱員在工作場所吸入二手煙對其健康的影響。不過我堅持，政府一定要廣泛諮詢市民及受影響行業的意見，及評估對經濟造成的影響，議會唔應該鼓勵政府在立法前唔做經濟評估，草率行事，亦不應將反吸煙的責任完全推卸給食肆及食肆員工身上。

2001年1月10日立法會修訂發言摘要